ਫੈਡਰਲ ਕਨਜ਼ਰਵੇਟਿਵਜ਼ ਨੇ ਓਟਾਵਾ ਤੋਂ ਕੀਤੀ ਗੈਸ ਅਤੇ ਡੀਜ਼ਲ ਫਿਊਲ ’ਤੇ ਲੱਗਣ ਵਾਲੇ ਟੈਕਸ ਨੂੰ ਹਟਾਉਣ ਦੀ ਮੰਗ

ਫੈਡਰਲ ਕਨਜ਼ਰਵੇਟਿਵਜ਼ ਨੇ ਓਟਾਵਾ ਤੋਂ ਮੰਗ ਕੀਤੀ ਹੈ ਕਿ ਇਸ ਸਾਲ ਦੇ ਬਾਕੀ ਸਮੇਂ ਲਈ ਗੈਸ ਅਤੇ ਡੀਜ਼ਲ ਫਿਊਲ ’ਤੇ ਲੱਗਣ ਵਾਲੇ ਟੈਕਸ ਨੂੰ ਹਟਾਇਆ ਜਾਵੇ। Tories ਦੀ ਯੋਜਨਾ ਅਨੁਸਾਰ, ਫਿਊਲ ਐਕਸਾਈਜ਼ ਟੈਕਸ (10 ਸੈਂਟ ਪ੍ਰਤੀ ਲੀਟਰ), ਕਲੀਨ ਫਿਊਲ ਸਟੈਂਡਰਡ (7 ਸੈਂਟ ਪ੍ਰਤੀ ਲੀਟਰ) ਅਤੇ GST (ਲਗਭਗ 8 ਸੈਂਟ ਪ੍ਰਤੀ ਲੀਟਰ) ਨੂੰ ਖਤਮ ਕੀਤਾ ਜਾਵੇਗਾ।

ਪਾਰਟੀ ਦਾ ਕਹਿਣਾ ਹੈ ਕਿ ਇਨ੍ਹਾਂ ਤਿੰਨਾਂ ਟੈਕਸਾਂ ਵਿੱਚ ਕਟੌਤੀ ਨਾਲ ਕੈਨੇਡੀਅਨਾਂ ਨੂੰ ਕੁੱਲ ਮਿਲਾ ਕੇ ਲਗਭਗ 25 ਸੈਂਟ ਪ੍ਰਤੀ ਲੀਟਰ ਦੀ ਬਚਤ ਹੋ ਸਕਦੀ ਹੈ। ਕਨਜ਼ਰਵੇਟਿਵਜ਼ ਨੇ ਇਹ ਵੀ ਸੁਝਾਅ ਦਿੱਤਾ ਹੈ ਕਿ ਸਾਲ ਦੇ ਬਾਅਦ ਕਲੀਨ ਫਿਊਲ ਸਟੈਂਡਰਡ ਵਾਲਾ ਟੈਕਸ ਸਥਾਈ ਤੌਰ ’ਤੇ ਘਟਾਇਆ ਜਾਵੇ।

ਪਾਰਟੀ ਦੇ ਬਿਆਨ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਇਸ ਸਮੇਂ ਕੈਨੇਡੀਅਨ ਨਾਗਰਿਕ ਅਮਰੀਕੀਆਂ ਨਾਲੋਂ ਕਰੀਬ 20 ਪ੍ਰਤੀਸ਼ਤ ਵੱਧ ਗੈਸ ਦੀ ਕੀਮਤ ਅਦਾ ਕਰ ਰਹੇ ਹਨ। ਇਸ ਵਿੱਚ ਇਹ ਵੀ ਦਰਸਾਇਆ ਗਿਆ ਹੈ ਕਿ ਆਸਟ੍ਰੇਲੀਆ, ਸਪੇਨ ਅਤੇ ਆਇਰਲੈਂਡ ਵਰਗੇ ਦੇਸ਼ਾਂ ਨੇ ਫਿਊਲ ਟੈਕਸ ਘਟਾ ਕੇ ਗੈਸ ਦੀਆਂ ਕੀਮਤਾਂ ਘਟਾਉਣ ਲਈ ਕਦਮ ਚੁੱਕੇ ਹਨ।

ਇਸ ਟੈਕਸ ਰਾਹਤ ਨੂੰ ਪੂਰਾ ਕਰਨ ਲਈ ਕਨਜ਼ਰਵੇਟਿਵਜ਼ ਨੇ ਕਿਹਾ ਹੈ ਕਿ ਲਿਬਰਲ ਸਰਕਾਰ ਦੇ “ਫ਼ਜ਼ੂਲ ਖਰਚੇ” ਵਿੱਚ ਕਟੌਤੀ ਕੀਤੀ ਜਾਵੇਗੀ, ਜਿਸ ਵਿੱਚ ਗਨ ਬਾਈਬੈਕ ਪ੍ਰੋਗਰਾਮ, ਪ੍ਰਸ਼ਾਸਨਿਕ ਖਰਚੇ, ਕਨਸਲਟੈਂਟਸ, ਵਿਦੇਸ਼ੀ ਮਦਦ ਅਤੇ ਹੋਰ ਪ੍ਰੋਜੈਕਟ ਸ਼ਾਮਲ ਹਨ।