ਸਰੀ ਦੇ ਵਿਅਕਤੀ ਨੇ ਕਥਿਤ ਸਿਨਾਲੋਆ ਕਾਰਟੈਲ ਮਾਮਲੇ ਦੀ ਸੁਣਵਾਈ ਟਾਲਣ ਦੀ ਮੰਗ

ਸਰੀ ਦੇ ਰਹਿਣ ਵਾਲੇ ਜੇਮਜ਼ ਸਕਲੇਟਰ ਨੇ ਬੀ.ਸੀ. ਸਰਕਾਰ ਵੱਲੋਂ ਉਸ ਦੀਆਂ ਜਾਇਦਾਦਾਂ ਜ਼ਬਤ ਕਰਨ ਲਈ ਚਲਾਏ ਜਾ ਰਹੇ ਸਿਵਲ ਫੋਰਫਿਟਰ ਕੇਸ ਦੀ ਸੁਣਵਾਈ ਮੁਲਤਵੀ ਕਰਨ ਲਈ ਅਦਾਲਤ ਵਿੱਚ ਅਰਜ਼ੀ ਦਿੱਤੀ ਹੈ। ਸਰਕਾਰ ਲਗਭਗ 40 ਲੱਖ ਡਾਲਰ ਮੁੱਲ ਦੇ ਸਰੀ ਦੇ ਦੋ ਘਰ ਕਥਿਤ ਗੈਰ-ਕਾਨੂੰਨੀ ਗਤੀਵਿਧੀਆਂ ਤੋਂ ਪ੍ਰਾਪਤ ਸੰਪਤੀ ਦੱਸਦਿਆਂ ਜ਼ਬਤ ਕਰਵਾਉਣਾ ਚਾਹੁੰਦੀ ਹੈ। ਸਰਕਾਰ ਦਾ ਦਾਅਵਾ ਹੈ ਕਿ ਸਕਲੇਟਰ ਅਤੇ ਉਸ ਦੇ ਦੋ ਸਾਥੀਆਂ ਨੇ ਸਿਨਾਲੋਆ ਕਾਰਟੈਲ ਦੇ ਸਾਬਕਾ ਮੁਖੀ ਇਸਮਾਈਲ "ਐਲ ਮਾਯੋ" ਜ਼ਾਮਬਾਡਾ ਨਾਲ ਮਿਲ ਕੇ ਕੈਨੇਡਾ ਵਿੱਚ ਕੋਕੀਨ ਦੀ ਤਸਕਰੀ ਦੀ ਯੋਜਨਾ ਬਣਾਈ ਸੀ। ਅਰਜ਼ੀ ਵਿੱਚ ਇਹ ਵੀ ਕਿਹਾ ਗਿਆ ਹੈ ਕਿ ਆਰ.ਸੀ.ਐਮ.ਪੀ. ਉਨ੍ਹਾਂ ਦੀਆਂ ਗੱਲਬਾਤਾਂ ਸੁਣ ਰਹੀ ਸੀ ਅਤੇ ਨਿਗਰਾਨੀ ਕਰ ਰਹੀ ਸੀ। ਸਕਲੇਟਰ ਦਾ ਕਹਿਣਾ ਹੈ ਕਿ ਇਹ ਨਵੇਂ ਦੋਸ਼ ਟਰਾਇਲ ਤੋਂ ਠੀਕ ਪਹਿਲਾਂ ਜੋੜੇ ਗਏ ਹਨ, ਜਿਸ ਕਾਰਨ ਉਸ ਨੂੰ ਆਪਣਾ ਬਚਾਅ ਤਿਆਰ ਕਰਨ ਲਈ ਹੋਰ ਸਮਾਂ ਚਾਹੀਦਾ ਹੈ। ਸਕਲੇਟਰ ਨੇ ਸਾਰੇ ਦੋਸ਼ਾਂ ਤੋਂ ਇਨਕਾਰ ਕੀਤਾ ਹੈ ਅਤੇ ਇਸ ਮਾਮਲੇ ਵਿੱਚ ਅਜੇ ਤੱਕ ਕਿਸੇ 'ਤੇ ਕੋਈ criminal ਦੋਸ਼ ਨਹੀਂ ਲੱਗੇ।