ਇੰਟਰਫੋਰ ਵੱਲੋਂ ਹੈੱਡਕੁਆਰਟਰ ਅਮਰੀਕਾ ਲਿਜਾਣ ਦੀ ਚਰਚਾ, ਬੀ.ਸੀ. ਦੇ ਜੰਗਲਾਤ ਖੇਤਰ ਵਿੱਚ ਚਿੰਤਾ
ਕੈਨੇਡਾ ਦੀ ਵੱਡੀ ਲੱਕੜ ਕੰਪਨੀ ਇੰਟਰਫੋਰ ਨੇ ਬਰਨਬੀ ਤੋਂ ਆਪਣਾ ਹੈੱਡਕੁਆਰਟਰ ਅਮਰੀਕਾ ਦੇ ਐਟਲਾਂਟਾ ਭੇਜਣ ਦੀਆਂ ਰਿਪੋਰਟਾਂ ਨੇ ਬੀ.ਸੀ. ਦੇ ਜੰਗਲਾਤ ਉਦਯੋਗ ਵਿੱਚ ਚਿੰਤਾ ਪੈਦਾ ਕਰ ਦਿੱਤੀ ਹੈ। ਹਾਲਾਂਕਿ ਕੰਪਨੀ ਨੇ ਸਪੱਸ਼ਟ ਕੀਤਾ ਹੈ ਕਿ ਉਹ ਬੀ.ਸੀ. ਨਹੀਂ ਛੱਡ ਰਹੀ ਅਤੇ ਇਸ ਤਬਦੀਲੀ ਨਾਲ ਕਿਸੇ ਕਰਮਚਾਰੀ ਦੀ ਛਾਂਟੀ ਨਹੀਂ ਹੋਵੇਗੀ।
ਪ੍ਰੀਮੀਅਰ ਡੇਵਿਡ ਈਬੀ ਨੇ ਕਿਹਾ ਕਿ ਇਹ ਘਟਨਾ ਦਰਸਾਉਂਦੀ ਹੈ ਕਿ ਬੀ.ਸੀ. ਨੂੰ ਅਮਰੀਕੀ ਬਾਜ਼ਾਰ 'ਤੇ ਨਿਰਭਰਤਾ ਘਟਾ ਕੇ ਭਾਰਤ ਸਮੇਤ ਹੋਰ ਦੇਸ਼ਾਂ ਨਾਲ ਵਪਾਰ ਵਧਾਉਣ ਦੀ ਲੋੜ ਹੈ। ਉਨ੍ਹਾਂ ਕਿਹਾ ਕਿ ਭਾਰਤ ਨਾਲ ਸੰਭਾਵਿਤ ਮੁਕਤ ਵਪਾਰ ਸਮਝੌਤੇ ਨਾਲ ਕੈਨੇਡੀਅਨ ਲੱਕੜ 'ਤੇ ਲੱਗਣ ਵਾਲੀਆਂ ਡਿਊਟੀਆਂ ਹਟ ਸਕਦੀਆਂ ਹਨ।
ਯੂਨਾਈਟਿਡ ਸਟੀਲਵਰਕਰਜ਼ ਯੂਨੀਅਨ ਦੇ ਜੈਫ਼ ਬ੍ਰੌਮਲੀ ਨੇ ਕਿਹਾ ਕਿ ਇਹ ਖ਼ਬਰ ਨਿਰਾਸ਼ਾਜਨਕ ਹੈ ਅਤੇ ਬੀ.ਸੀ. ਦੇ ਜੰਗਲਾਤ ਖੇਤਰ ਦੀਆਂ ਮੁਸ਼ਕਲਾਂ ਨੂੰ ਦਰਸਾਉਂਦੀ ਹੈ। ਉਨ੍ਹਾਂ ਉਮੀਦ ਜਤਾਈ ਕਿ ਵੈਸਟ ਫ੍ਰੇਜ਼ਰ ਅਤੇ ਕੈਨਫੋਰ ਵਰਗੀਆਂ ਹੋਰ ਕੰਪਨੀਆਂ ਆਪਣੇ ਹੈੱਡਕੁਆਰਟਰ ਬੀ.ਸੀ. ਵਿੱਚ ਹੀ ਰੱਖਣਗੀਆਂ।
ਦੂਜੇ ਪਾਸੇ ਗ੍ਰੈਂਡ ਫੋਰਕਸ ਦੇ ਮੇਅਰ ਐਵਰਟ ਬੇਕਰ ਨੇ ਦੱਸਿਆ ਕਿ ਕੰਪਨੀ ਨੇ ਉਨ੍ਹਾਂ ਨੂੰ ਭਰੋਸਾ ਦਿੱਤਾ ਹੈ ਕਿ ਸਿਰਫ਼ ਕੁਝ ਕਾਰਪੋਰੇਟ ਅਹੁਦੇ ਜਾਰਜੀਆ ਦੇ ਮੌਜੂਦਾ ਦਫ਼ਤਰ ਵਿੱਚ ਤਬਦੀਲ ਕੀਤੇ ਜਾਣਗੇ ਤਾਂ ਜੋ ਕੈਨੇਡਾ ਅਤੇ ਅਮਰੀਕਾ ਦੇ ਕੰਮਕਾਜ ਨੂੰ ਬਿਹਤਰ ਢੰਗ ਨਾਲ ਸੰਭਾਲਿਆ ਜਾ ਸਕੇ। ਉਨ੍ਹਾਂ ਕਿਹਾ ਕਿ ਇਸ ਤਬਦੀਲੀ ਕਾਰਨ ਕਿਸੇ ਵੀ ਕਰਮਚਾਰੀ ਦੀ ਨੌਕਰੀ ਨਹੀਂ ਜਾਵੇਗੀ।
ਇਸ ਲੇਖ ਨੂੰ ਸਾਂਝਾ ਕਰੋ:
