ਸਰੀ ਦੇ ਓਲੰਪਿਕ ਪਹਿਲਵਾਨ ਅਮਰਵੀਰ ਢੇਸੀ ਐਂਟੀ-ਡੋਪਿੰਗ ਨਿਯਮਾਂ ਦੀ ਉਲੰਘਣਾ ਦੇ ਮਾਮਲੇ ਵਿੱਚ ਮੁਅੱਤਲ

ਸਰੀ ਦੇ ਓਲੰਪਿਕ ਪਹਿਲਵਾਨ ਅਮਰਵੀਰ ਢੇਸੀ ਨੂੰ ਐਂਟੀ-ਡੋਪਿੰਗ ਨਿਯਮਾਂ ਦੀ ਉਲੰਘਣਾ ਦੇ ਮਾਮਲੇ ਵਿੱਚ ਦੋ ਸਾਲ ਲਈ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਸਪੋਰਟ ਇੰਟੀਗ੍ਰਿਟੀ ਕੈਨੇਡਾ ਨੇ ਦੱਸਿਆ ਕਿ ਢੇਸੀ ਨੇ 12 ਮਹੀਨਿਆਂ ਦੇ ਅੰਦਰ ਤਿੰਨ ਵਾਰ ਆਪਣੀ ਲਾਜ਼ਮੀ ਵੇਅਰਅਬਾਊਟਸ (whereabouts) ਜਾਣਕਾਰੀ ਦੇਣ ਵਿੱਚ ਨਾਕਾਮੀ ਕੀਤੀ, ਜਿਸ ਕਾਰਨ ਇਹ ਕਾਰਵਾਈ ਕੀਤੀ ਗਈ।

ਅਮਰਵੀਰ ਢੇਸੀ ਨੇ ਦੋਸ਼ਾਂ ਨੂੰ ਚੁਣੌਤੀ ਦੇਣ ਅਤੇ ਸਜ਼ਾ ਘਟਾਉਣ ਲਈ ਸੁਣਵਾਈ ਦੀ ਮੰਗ ਕੀਤੀ ਸੀ। ਹਾਲਾਂਕਿ, 9 ਜੂਨ ਨੂੰ ਆਰਬਿਟਰੇਟਰ ਕੈਰੋਲ ਰਾਬਰਟਸ ਨੇ ਨਿਯਮਾਂ ਦੀ ਉਲੰਘਣਾ ਦੀ ਪੁਸ਼ਟੀ ਕਰਦਿਆਂ ਦੋ ਸਾਲ ਦੀ ਪਾਬੰਦੀ ਬਰਕਰਾਰ ਰੱਖੀ। ਉਨ੍ਹਾਂ 'ਤੇ ਪਹਿਲਾਂ ਹੀ ਅਸਥਾਈ ਮੁਅੱਤਲੀ ਲਾਗੂ ਸੀ ਅਤੇ ਹੁਣ ਇਹ ਪਾਬੰਦੀ 30 ਮਾਰਚ 2028 ਤੱਕ ਜਾਰੀ ਰਹੇਗੀ। ਇਸ ਦੌਰਾਨ ਢੇਸੀ ਨਾ ਤਾਂ ਕਿਸੇ ਮੁਕਾਬਲੇ ਵਿੱਚ ਹਿੱਸਾ ਲੈ ਸਕਣਗੇ ਅਤੇ ਨਾ ਹੀ ਕੈਨੇਡੀਅਨ ਐਂਟੀ-ਡੋਪਿੰਗ ਪ੍ਰੋਗਰਾਮ ਜਾਂ ਵਰਲਡ ਐਂਟੀ-ਡੋਪਿੰਗ ਕੋਡ ਦੇ ਅਧੀਨ ਆਉਣ ਵਾਲੀ ਕਿਸੇ ਵੀ ਖੇਡ ਗਤੀਵਿਧੀ, ਕੋਚਿੰਗ ਜਾਂ ਟੀਮ ਨਾਲ ਟ੍ਰੇਨਿੰਗ ਕਰ ਸਕਣਗੇ। ਅਮਰਵੀਰ ਢੇਸੀ ਨੇ ਪੈਰਿਸ 2024 ਓਲੰਪਿਕਸ ਵਿੱਚ ਪੁਰਸ਼ਾਂ ਦੇ 125 ਕਿਲੋਗ੍ਰਾਮ ਫ੍ਰੀਸਟਾਈਲ ਵਰਗ ਵਿੱਚ ਹਿੱਸਾ ਲਿਆ ਸੀ ਅਤੇ ਕੁੱਲ ਨੌਵੇਂ ਸਥਾਨ 'ਤੇ ਰਹੇ ਸਨ।