Cultus Lake Waterpark ਵਿੱਚ ਹਾਦਸੇ ਕਾਰਨ 12 ਜਣੇ ਜ਼ਖਮੀ

ਚਿਲੀਵੈਕ ਆਰਸੀਐਮਪੀ ਅਨੁਸਾਰ ਸੋਮਵਾਰ ਸਵੇਰੇ ਕਲਟਸ ਲੇਕ ਵਾਟਰਪਾਰਕ ਵਿੱਚ ਵਾਪਰੇ ਇੱਕ ਗੰਭੀਰ ਹਾਦਸੇ ਵਿੱਚ 12 ਨੌਜਵਾਨ ਜ਼ਖ਼ਮੀ ਹੋ ਗਏ। ਪੁਲਿਸ ਨੂੰ ਸਵੇਰੇ ਕਰੀਬ 11:30 ਵਜੇ ਤੋਂ ਪਹਿਲਾਂ ਪਾਰਕ ਵਿੱਚ ਐਮਰਜੈਂਸੀ ਸਥਿਤੀ ਦੀ ਸੂਚਨਾ ਮਿਲੀ ਸੀ। ਆਰਸੀਐਮਪੀ ਦੀ ਕਾਰਪੋਰਲ ਕਾਰਮਨ ਕੀਨਰ ਨੇ ਦੱਸਿਆ ਕਿ ਸਾਰੇ ਜ਼ਖ਼ਮੀ ਵਿਅਕਤੀਆਂ ਦੀ ਹਾਲਤ ਸਥਿਰ ਹੈ, ਹਾਲਾਂਕਿ ਉਨ੍ਹਾਂ ਨੂੰ ਗੰਭੀਰ ਸੱਟਾਂ ਲੱਗੀਆਂ ਹਨ ਅਤੇ ਇਲਾਜ ਲਈ ਹਸਪਤਾਲ ਭੇਜਿਆ ਗਿਆ ਹੈ। ਬੀ.ਸੀ. ਐਮਰਜੈਂਸੀ ਹੈਲਥ ਸਰਵਿਸਿਜ਼ ਮੁਤਾਬਕ ਕਈ ਐਂਬੂਲੈਂਸਾਂ, ਐਡਵਾਂਸਡ ਕੇਅਰ ਪੈਰਾਮੈਡਿਕਸ ਅਤੇ ਹੋਰ ਐਮਰਜੈਂਸੀ ਸਰੋਤ ਮੌਕੇ ‘ਤੇ ਭੇਜੇ ਗਏ, ਜਦਕਿ ਜ਼ਖ਼ਮੀਆਂ ਵਿੱਚੋਂ ਦੋ ਨੂੰ ਏਅਰ ਐਂਬੂਲੈਂਸ ਰਾਹੀਂ ਹਸਪਤਾਲ ਲਿਜਾਇਆ ਗਿਆ। ਕੋਕਵਿਟਲਮ ਸਕੂਲ ਡਿਸਟ੍ਰਿਕਟ ਦੇ ਅਧਿਕਾਰੀ ਕੇਨ ਹੌਫ ਨੇ ਦੱਸਿਆ ਕਿ ਜ਼ਖ਼ਮੀਆਂ ਵਿੱਚ ਮਿਨੇਖਾਡਾ ਮਿਡਲ ਸਕੂਲ ਦੇ ਵਿਦਿਆਰਥੀ ਵੀ ਸ਼ਾਮਲ ਹਨ ਅਤੇ ਉਨ੍ਹਾਂ ਦੀ ਹਾਲਤ ਸਥਿਰ ਦੱਸੀ ਜਾ ਰਹੀ ਹੈ। ਕਲਟਸ ਲੇਕ ਵਾਟਰਪਾਰਕ ਦੇ ਮੁੱਖ ਪ੍ਰਸ਼ਾਸਕੀ ਅਧਿਕਾਰੀ ਐਂਡਰੂ ਸਟੂਨਨਬਰਗ ਨੇ ਘੋਸ਼ਣਾ ਕੀਤੀ ਕਿ ਪਾਰਕ ਅਗਲੇ 48 ਘੰਟਿਆਂ ਲਈ ਬੰਦ ਰਹੇਗਾ ਤਾਂ ਜੋ ਘਟਨਾ ਦੀ ਸੁਤੰਤਰ ਅਤੇ ਪੂਰੀ ਜਾਂਚ ਕੀਤੀ ਜਾ ਸਕੇ। ਉਨ੍ਹਾਂ ਕਿਹਾ ਕਿ ਸ਼ੁਰੂਆਤੀ ਜਾਣਕਾਰੀ ਮੁਤਾਬਕ ਇਹ ਹਾਦਸਾ ਬਿਜਲੀ ਨਾਲ ਸੰਬੰਧਤ ਲੱਗਦਾ ਹੈ, ਹਾਲਾਂਕਿ ਇਸ ਦੀ ਅਜੇ ਪੁਸ਼ਟੀ ਨਹੀਂ ਹੋਈ।

ਅਧਿਕਾਰੀਆਂ ਅਨੁਸਾਰ ਹਾਦਸਾ “ਜ਼ੀਰੋ ਟੂ 60 ਰੇਸਵੇ” ਰਾਈਡ ਦੇ ਹੇਠਾਂ ਬਣੇ ਕਤਾਰਬੰਦੀ ਖੇਤਰ ਵਿੱਚ ਵਾਪਰਿਆ, ਜਿੱਥੇ ਨੌਜਵਾਨ ਰੇਲਿੰਗ ਦੇ ਸੰਪਰਕ ਵਿੱਚ ਆਏ। ਉਸ ਵੇਲੇ ਕੋਈ ਵੀ ਬੱਚਾ ਪਾਣੀ ਵਿੱਚ ਨਹੀਂ ਸੀ। ਘਟਨਾ ਦੇ ਸਹੀ ਕਾਰਨਾਂ ਦਾ ਪਤਾ ਲਗਾਉਣ ਲਈ ਤਕਨੀਕੀ ਮਾਹਿਰ ਜਾਂਚ ਕਰ ਰਹੇ ਹਨ। ਵਰਕਸੇਫ ਬੀਸੀ ਵੀ ਇਸ ਮਾਮਲੇ ਦੀ ਵੱਖਰੀ ਜਾਂਚ ਕਰੇਗਾ।